កិច្ចប្រជុំកំពូលហ្វ្រង់កូហ្វូនី

កម្ពុជាមានកិត្តិយសក្នុងការធ្វើជាម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ ជាលើកដំបូងក្នុងប្រវត្តិសាស្ត្ររបស់ខ្លួន។ កិច្ចប្រជុំកំពូលនេះនឹងប្រព្រឹត្តទៅនៅថ្ងៃទី១៥ និង១៦ ខែវិច្ឆិកា ឆ្នាំ២០២៦ នៅរាជធានីភ្នំពេញ។ រាជធានីភ្នំពេញមានលក្ខណៈពិសេសដាច់ដោយឡែក តាមរយៈការផ្សារភ្ជាប់គ្នាដ៏គួរឱ្យកត់សម្គាល់ រវាងប្រវត្តិសាស្ត្រសម្គាល់ដោយភាពធន់ និងបេតិកភណ្ឌស្ថាបត្យកម្មដែលលាយបញ្ចូលគ្នានូវឥទ្ធិពលអាណានិគម និងខ្មែរ ក៏ដូចជាទីតាំងភូមិសាស្ត្រដ៏ល្អឥតខ្ចោះនៅចំណុចប្រសព្វនៃទន្លេមុខបួន។ ព្រឹត្តិការណ៍អន្តរជាតិនេះគឺជាព្រឹត្តិការណ៍ដ៏សំខាន់មួយសម្រាប់អង្គការអន្តរជាតិហ្វ្រង់កូហ្វូនី (OIF) និងសម្រាប់ការលើកកម្ពស់ហ្វ្រង់កូហ្វូនីនៅអាស៊ី។

កិច្ចប្រជុំកំពូល ដែលជាស្ថាប័នធ្វើការសម្រេចចិត្តកំពូលនៃអង្គការ OIF ប្រមូលផ្តុំប្រមុខរដ្ឋ និងរដ្ឋាភិបាលនៃរដ្ឋសមាជិក និងរដ្ឋាភិបាលចំនួន៩០ រៀងរាល់ពីរឆ្នាំម្តង ដើម្បីពិភាក្សាអំពីបញ្ហានៃកិច្ចសហប្រតិបត្តិការនយោបាយ សេដ្ឋកិច្ច វប្បធម៌ និងអប់រំ ក៏ដូចជាតម្លៃរួមដែលគាំទ្រដល់សហគមន៍និយាយភាសាបារាំង។

កិច្ចប្រជុំកំពូលនេះ ក៏មានភាពពិសេសផងដែរ ព្រោះធ្វើឡើងក្នុងឆ្នាំបោះឆ្នោតជ្រើសរើសអគ្គលេខាធិការអង្គការ OIF សម្រាប់អាណត្តិបន្ទាប់។ សេចក្តីសម្រេចទាំងឡាយដែលធ្វើឡើងនៅរាជធានីភ្នំពេញ នឹងរួមចំណែកដល់ការកំណត់ទិសដៅយុទ្ធសាស្ត្ររបស់អង្គការOIF សម្រាប់ឆ្នាំខាងមុខ។

និមិត្តរូបមួយដ៏មានឥទ្ធិពលនៃការប្តេជ្ញាចិត្តរបស់កម្ពុជា

ក្នុងនាមជាសមាជិកពេញសិទ្ធិនៃអង្គការOIFចាប់តាំងពីឆ្នាំ១៩៩៣ កម្ពុជាបានបញ្ជាក់ជាថ្មី តាមរយៈការធ្វើជាម្ចាស់ផ្ទះនៃកិច្ចប្រជុំកំពូលនេះ នូវការប្តេជ្ញាចិត្តប្រកបដោយចីរភាពរបស់ខ្លួនចំពោះឧត្តមគតិហ្វ្រង់កូហ្វូនី។ ការប្តេជ្ញានេះគឺស្របតាមកេរតំណែលរបស់ព្រះបាទសម្តេចព្រះបរមរតនៈកោដិ ដែលជាឥស្សរជនស្ថាបនិកនៃអង្គការOIF និងជាសក្ខីភាពនៃឆន្ទៈរបស់ព្រះរាជាណាចក្រកម្ពុជា ក្នុងការដើរតួនាទីយ៉ាងសកម្ម លើកិច្ចសហប្រតិបត្តិការពហុភាគី។

បន្ទាប់ពីកិច្ចប្រជុំកំពូលលើកទី១៩ ដែលបានធ្វើឡើងនៅប្រទេសបារាំងក្នុងឆ្នាំ២០២៤ កិច្ចប្រជុំឆ្នាំ២០២៦ នឹងក្លាយជាកិច្ចប្រជុំកំពូលហ្វ្រង់កូហ្វូនីលើកទីពីរដែលរៀបចំឡើងនៅអាស៊ី បន្ទាប់ពីកិច្ចប្រជុំនៅទីក្រុងហាណូយ កាលពីឆ្នាំ១៩៩៧។

ការប្រមូលផ្តុំជាតិ និងអន្តរជាតិ

អាជ្ញាធរកម្ពុជាបានអនុវត្តការរៀបចំជារចនាសម្ព័ន្ធ តាមរយៈការបង្កើតគណៈកម្មាធិការជាតិ ដោយមានការគាំទ្រពីលេខាធិការដ្ឋាន និងអនុគណៈកម្មាធិការចំនួនប្រាំមួយ ដែលសម្របសម្រួលយ៉ាងជិតស្និទ្ធជាមួយ OIF។ ការរៀបចំផ្តោតលើផ្នែកសំខាន់ៗជាច្រើន រួមមាន៖ ពិធីការការទូត សន្តិសុខ ការទំនាក់ទំនង ភស្តុភារ ក៏ដូចជាការរៀបចំព្រឹត្តិការណ៍អម ដែលផ្តោតលើផ្នែកសេដ្ឋកិច្ច វប្បធម៌ និងអប់រំ។

ព្រឹត្តិការណ៍អមកិច្ចប្រជុំកំពូល ដែលជាកម្មវិធីដ៏សម្បូរបែប និងចម្រុះជាច្រើន នឹងត្រូវរៀបចំឡើង ដើម្បីអបអរសាទរអង្គការ OIF តាមរយៈ៖

• ភូមិហ្វ្រង់កូហ្វូន (Village de la Francophonie)ដែលបង្ហាញពីភាពចម្រុះនៃវប្បធម៌ និងសិល្បៈហ្វ្រង់កូហ្វូន;
• គំនិតផ្តួចផ្តើមសេដ្ឋកិច្ច និងឌីជីថល ជាពិសេសត្តិការណ៍ហ្វ្រង់កូតិច (FrancoTech);
• សកម្មភាពបន្ទាប់បន្សំផ្សេងៗ ដែលមានគោលបំណងពង្រឹងការបង្រៀន ការរៀនសូត្រ និងការផ្សព្វ​ផ្សាយ​ជាភាសាបារាំង។

ឱកាសជាយុទ្ធសាស្ត្រសម្រាប់តួអង្គសេដ្ឋកិច្ចហ្វ្រង់កូហ្វូន

ក្រៅពីសារៈសំខាន់ផ្នែកនយោបាយ កិច្ចប្រជុំកំពូលហ្វ្រង់កូហ្វូនីផ្តល់នូវវេទិកាដ៏សំខាន់មួយសម្រាប់ភាពលេចធ្លោ ការសន្ទនា និងបណ្តាញទំនាក់ទំនងសម្រាប់តួអង្គសេដ្ឋកិច្ច ស្ថាប័ន និងកុងស៊ុលនៅក្នុងលំហហ្វ្រង់កូហ្វូន។ កិច្ចប្រជុំកំពូលហ្វ្រង់កូហ្វូនីបានជួយលើកកម្ពស់ការផ្លាស់ប្តូរ ពង្រឹងកិច្ចសហប្រតិបត្តិការត្បូង-ត្បូង និងជើង-ត្បូង និងរួមចំណែកដល់ការលើកកម្ពស់ដែនដី ជំនាញ និងគំនិតផ្តួចផ្តើមសេដ្ឋកិច្ចហ្វ្រង់កូហ្វូន។

ស្របតាមមូលបទនៃកិច្ចប្រជុំកំពូល «ប្តេជ្ញាបន្តថែរក្សាសន្តិភាព ដើម្បីវិបុលភាពរួម និងស្ថិរភាពយូរអង្វែង» ការកិច្ចប្រជុំកំពូលអន្តរជាតិនេះនឹងបញ្ជាក់ពីតួនាទីសំខាន់នៃកិច្ចសហប្រតិបត្តិការបារាំងក្នុងការកសាងអនាគតដែលប្រកបដោយបរិយាប័នភាពធន់ និងវិបុលភាពជាងមុន។