មូលបទនៃកិច្ចប្រជុំកំពូល

មូលបទ «ប្តេជ្ញាបន្តថែរក្សាសន្តិភាព ដើម្បីវិបុលភាពរួម និងស្ថិរភាពយូរអង្វែង» មិនត្រូវបានជ្រើសរើសដោយចៃដន្យសម្រាប់កិច្ចប្រជុំកំពូលហ្វ្រង់កូហ្វូនីលើកទី២០ នោះទេ។ វាបរិយាយអំពីការពិតនៃសម័យកាល ដែលយើងកំពុងរស់នៅ — សម័យកាល ដែលភាពតានតឹងភូមិសាស្ត្រនយោបាយកំពុងកើនឡើង នៅពេលដែលវិបត្តិសេដ្ឋកិច្ចកំពុងធ្វើឱ្យសង្គមចុះខ្សោយ ដែលស្ថិតនៅក្រោមសម្ពាធរួចហើយ និងនៅពេលដែលស្ថិរភាព ដែលយើងគិតថាយើងសម្រេចបាន កំពុងបង្ហាញថា នៅគ្រប់ទីកន្លែងក្នុងពិភពលោក ស្ថិរភាពនេះនៅមានភាពផុយស្រួយជាងអ្វីដែលយើងគិត។

សម្រាប់ប្រទេសកម្ពុជា ដែលជាប្រទេសម្ចាស់ផ្ទះ មូលបទនេះស្របនឹងការពិតជាក់ស្តែង។ ជម្លោះព្រំដែនដែលជាស្នាមប្រវត្តិសាស្ត្ររបស់តំបន់នេះ ជួនកាលគ្រប់គ្រាន់ដើម្បីបំផ្លាញទំនុកចិត្ត រារាំងពាណិជ្ជកម្ម និងកិច្ចសហប្រតិបត្តិការស្មុគស្មាញ ដែលមានសារៈសំខាន់ខ្លាំង។ ការដាក់សន្តិភាពនៅក្នុងបេះដូងនៃការជជែកពិភាក្សា គឺស្មើនឹងទទួលស្គាល់ថា សន្តិភាពមិនមែនកើតឡើងដោយឯកឯងនោះទេ — គឺតម្រូវឱ្យមានការប្តេជ្ញាជាប្រចាំតាមរយៈការសន្ទនា ការសម្របសម្រួល និងការកសាងទំនុកចិត្តដោយអត់ធ្មត់រវាងប្រជាជន និងរវាងរដ្ឋ។

ប្រវត្តិសាស្ត្ររបស់ប្រទេសកម្ពុជាបានបន្ថែមភាពរស់រវើក និងអត្ថន័យជ្រាលជ្រៅដល់មូលបទនេះ។ ការងើបចេញពីជម្លោះ និងអស្ថិរភាពរាប់ទសវត្សរ៍ ហើយបន្ទាប់មកការកសាងឡើងវិញ — សេដ្ឋកិច្ច សង្គម និងស្ថាប័ន — គឺជាបទពិសោធន៍នៃការឈឺចាប់មួយ ដែលមានប្រទេសមិនច្រើនទេបានឆ្លងកាត់។ រឿងនេះបានបង្រៀនប្រទេសកម្ពុជានូវមេរៀនសំខាន់មួយ៖ សន្តិភាពមិនមែនគ្រាន់តែជាតម្លៃសីលធម៌នោះទេ ប៉ុន្តែជាលក្ខខណ្ឌជាក់ស្តែងសម្រាប់ការអភិវឌ្ឍ។ បើគ្មានសន្តិភាព ការវិនិយោគនឹងមិនកើតមាន ការងារថ្មីៗនឹងមិនត្រូវបានបង្កើត ហើយកម្រិតជីវភាពរស់នៅរបស់ប្រជាជននឹងស្ថិតនៅទ្រឹង។ ឥឡូវនេះ ប្រទេសកម្ពុជាអាចចែករំលែកដំណើរឆ្លងកាត់បទពិសោធន៍នេះដោយភាពជឿជាក់ — មិនមែនជាអរូបីទេ ប៉ុន្តែជាមេរៀនជីវិត។

ចំពោះអង្គការអន្តរជាតិហ្វ្រង់កូហ្វូនី (OIF) មូលបទនេះមានឫសគល់នៅក្នុងប្រពៃណីយូរអង្វែងមួយ។ ចាប់ពីសេចក្តីប្រកាសបាម៉ាកូ រហូតដល់ក្របខ័ណ្ឌយុទ្ធសាស្ត្រថ្មីៗបំផុត អង្គការ OIF បានគាំទ្រជាប់លាប់នូវគំនិតដែលថា លទ្ធិប្រជាធិបតេយ្យ សិទ្ធិមនុស្ស និងការដោះស្រាយជម្លោះដោយសន្តិវិធីមិនមែនគ្រាន់តែជាការរីកចំរើនខាងវោហាសាស្ត្រនោះទេ ប៉ុន្តែជាលក្ខខណ្ឌពិតប្រាកដសម្រាប់ការអភិវឌ្ឍប្រកបដោយចីរភាព។ កិច្ចប្រជុំកំពូលនេះផ្តល់នូវដង្ហើមជាថ្មីសម្រាប់ការប្តេជ្ញាចិត្តចំពោះសន្តិភាព — ដែលនេះជាពេលវេលាសំខាន់ជាងពេលណាៗបំផុត។

ទំនាក់ទំនងរវាងសន្តិភាព និងវិបុលភាព ដែលជាចំណុចស្នូលនៃមូលបទនេះ សមនឹងទទួលបានការយកចិត្តទុកដាក់យ៉ាងខ្លាំង។ នៅក្នុងពិភពលោកមួយដែលវិសមភាពកំពុងរីករាលដាល ដែលការប្រែប្រួលអាកាសធាតុកំពុងផ្លាស់ប្តូរទីលំនៅរបស់ប្រជាជន និងកន្លែងដែលវិបត្តិស្បៀងអាហារកំពុងកើនឡើង វិបុលភាពដែលមិនត្រូវបានចែករំលែក គឺជាវិបុលភាពដែលមិនស្ថិតស្ថេរ។ អង្គការ OIF ​លើកកម្ពស់​ចក្ខុវិស័យ​នៃ​ការអភិវឌ្ឍ​ដែល​ផ្អែក​លើ​កិច្ចសហប្រតិបត្តិការ ការអប់រំ សហគ្រិនភាព​យុវជន និង​ការផ្តល់អំណាច​ដល់​ស្ត្រី — ចក្ខុវិស័យ​ដែល​សម​ហេតុផល ​តែ​ក្នុង​បរិយាកាសដែលមាន​ស្ថិរភាព និង​បើកចំហ​ប៉ុណ្ណោះ។

ជាចុងក្រោយ «ស្ថិរភាពយូរអង្វែង» ដែល​បាន​លើកឡើង​ក្នុង​មូលបទ​មិនមែន​គ្រាន់តែ​ជា​អវត្តមាន​នៃ​សង្គ្រាម​នោះទេ។ វា​ទាមទារ​ឲ្យ​មាន​ស្ថាប័ន​រឹងមាំ ការសន្ទនា​អន្តរវប្បធម៌​ដ៏​រស់រវើក ការតស៊ូ​យ៉ាងសកម្ម​ចំពោះ​សុន្ទរកថា​ស្អប់ខ្ពើម និង​កិច្ចសហប្រតិបត្តិការ​អន្តរជាតិ​ ដែល​ផ្អែកលើ​ការជឿទុកចិត្ត​ជាជាងការប្រើប្រាស់​អំណាច។ នេះ​គឺជា​លំហ​ដែល​អង្គការ OIF ​ស្វែងមានបំណងបង្កើតឡើង — លំហ​ដែល​ភាពចម្រុះ​គឺជា​ទ្រព្យ និង​ជា​កន្លែង​ដែល​ការពិគ្រោះយោបល់​នៅតែ​ជា​ការឆ្លើយតប​ដំបូង​ចំពោះ​វិបត្តិ។

ដូច្នេះ កិច្ចប្រជុំ​កំពូល​លើក​ទី២០ នៅ​រាជធានី​ភ្នំពេញ​ ធ្វើឡើងនៅក្នុងកាលៈទេសៈមួយដែលសមស្រប ជាមួយនឹងមូលបទដែលត្រឹមត្រូវ​។ កិច្ចប្រជុំនេះ​ផ្តល់​ឱកាស​ដ៏កម្រ​មួយដល់​ពិភពហ្វ្រង់កូហ្វូន នោះគឺ មិនត្រឹមតែអបអរសាទរសន្តិភាពជាពាក្យសម្ដីប៉ុណ្ណោះទេ ប៉ុន្តែត្រូវពិភាក្សា និងចាត់វិធានការរួមគ្នាយ៉ាងម៉ឺងម៉ាត់ ដើម្បីពង្រឹងសន្តិភាពឱ្យកាន់តែរឹងមាំ យុត្តិធម៌ និងមាននិរន្តរភាពសម្រាប់មនុស្សជំនាន់បច្ចុប្បន្ន និងអនាគត។